يوې نوې څېړنې موندلې، چې د شپې له مخې د کوچنيانو د لږ ويدېدو او په راتلونکې کې په الکولو او نورو نشه‌یي توکو د هغوی د روږدي کېدا ترمنځ ژوره اړيکه شته.

د «فوکس نيوز» امريکايي چېنل له راپور سره سم دغه څېړنه د «پنسلوينيا» ولايت د پوهنتون څېړونکو ترسره کړې ده، چې په کې يې په ټولو متحده ايالاتو کې د ۲۰ ښارونو په ۱۵۱۴ کوچنيانو ازموينه کړې او د لويېدو په بېلا بېلو پړاوونو کې يې د هغوی د خوب اندازه او وختونه تر څار لاندې نيولي دي.

دغه کوچنيان د زلميتوب تر وخته تر څار لاندې وو او پايلو وښوده چې کوم ګډونوال چې د شپې ناوخته خپلو خوبځايونو ته تللي او د کوچنيوالي پر مهال د لږو ساعتونو لپاره ويدېدلي دي؛ ۱۵ کلنۍ ته په رسېدو ۴۵ سلنه ډېر د الکولو او ۲۶ سلنه ډېر د چرسو کارونې ته ورګرځېدلي دي.

د څېړنې يوه ګډونوال ډاکټر ډيويډ ريچنبرګر چې د پنسلوينيا ولايت د پوهنتون د «Biobehavioral Health» د څانګې څېړونکی هم دی؛ ويلي دي چې: «په عموم کې زموږ پايلې دا ښيي چې خوب په دې کې پرېکنده رول لري چې کوچنيان به زلميتوب ته د رسېدو پر مهال په الکولو او نورو نشه‌يي توکو روږدي کېږي».

هغه زياته کړې ده: «دا يقيني کول چې کوچنيان ښه او کافي خوب کوي؛ په اوږد مهال کې د هغوی روغتيا ساتي او د ژوند په راتلونکي وخت کې يې په دوی پورې ځانګړې مثبتې صحي رويې ته هڅوي».

بل پلو د «رانډ» ټولنې مشهورې ټولنپوهې او د سلوکياتو متخصصې ډاکټرې وينډي ټروکسيل ويلي چې دا څېړنه هغه دلايل نور هم زياتوي کومو چې ښودلې چې د خوب اړوند ستونزې ښايي د ژوند په راتلونکي وخت کې «له ګواښه ډکه صحي رويه» رامنځته کړي. آغلې ټروکسيل په دې څېړنه کې ګډون نه درلود.

نوموړې دې ته اشاره کړې چې د دې لامل ښايي په غبرګون او عواطفو د کنټرول په مهارتونو د کم خوبۍ منفي اغېزې وي، چې دا اغېزې ښايي د اوږدو کلونو لپاره پاتې شي.