د افغانستان بانک خبر ورکړی، چې غواړي سبا چهارشنبه د رجب المرجب میاشتې په ۷ مه نېټه د داوطلبۍ له لارې ۱۵ میلیونه امریکايي ډالر د لیلام په ډول وپلوري.

یاد بانک له سوداګریزو بانکونو، د صرافۍ او پولي خدمتونو له شرکتونو څخه چې په شرایطو برابر وي غوښتنه کړې، چې په دې داوطلبۍکې ګډون وکړي او د داوطلبۍ ګټونکي اړ دي تر څو خپل حسابونه د لیلام د ورځې تر پایه تصفیه کړي.

د افغانستان بانک ویلي، چې د اسعارو د لیلام په داوطلبۍ کې د معاملاتو قسمي تسویې ته اجازه نه ورکول کیږي، د داوطلبۍ ګټونکي اړ دي چې د خپل ذمت د قیمت پیسې په یو ځل په نغدي ډول په ټاکلې موده کې د افغانستان بانک ته وسپاري.

یاده حکومتي اداره داسې حال کې د ډالرو د لیلام خبر ورکوي، چې بلومبرګ تازه راپور له مخې افغانۍ د نړۍ درېیو باثباته اسعارو لېست کې راغلې ده.