مسکو کې چاودنه؛ لوړ پوړی روسی جنرال وژل شوی
د روسیې په پلازمېنه مسکو کې نن سه شنبې په یوه چاودنه کې د روسیې پوځ د کیمياوي او اټومي دفاعي ځواکونو مشر جنرال ایګور کریلوف وژل شوی.
د روسیې ټاس خبري اژانس یې په تړاو ویلي، کریلوف د ډسمبر په ۱۷ مه د مسکو په «ریازانسکي سړک» سیمه کې د یوې استوګنیزې ودانۍ ته څېرمه په چاودنه کې وژل شوی.
سرچینې د روسیې د تحقیقاتو کمېټې ویاندې سویتلانا پیټرنکو له قوله ویلي، یادې ودانۍ ته څېرمه په یوه برقي موټرسایکل کې چاودېدونکو توکو د چاودنې له امله دغه جنرال وژل شوی او په وینا یې، د پېښې په تړاو د پولیسو څېړنې روانې دي.
