د کليو بیارغونې او پراختیا وزارت خبر ورکړی، چې د کاپیسا ولایت په لومړۍ او دویمې حصې ولسوالیو کې د څه باندې ۴۴۱میلیونه افغانیو په ارزښت ۳۳۱ بېلابېلي پراختیایي پروژې ګټي اخیستنې ته وسپارل شوې.

د کلیو بیارغونې او پراختیا وزیر ملامحمدیونس اخندزاده د دغو پروژو د ګټي اخیستني په مراسمو کې ویلي، د خلکو لومړیتوبونو په پام کې نیولو سره د متوازنو پراختیایي پروژو پلي کول د حکومت مسئولیت دی.

د سرچینې په خبره، دغه پروژې چې د یاد وزارت په هڅو او د یونپس مؤسسې په مالي ملاتړ پلې شوې پکې د کلیوالي سړکونو جغل اچول، د څښاک د پاکو اوبو شبکو جوړول، د اوبو د څاګانو کیندل او ترمیم، د کرنیزو کانالونو پاکول، د محافظوي دېوالونو، سربندونو او پلچکونو جوړول شامل دي.

خبر کې زیاته شوې، چې د دغو پروژو په بشپړېدو سره په یادو برخو کې د ځایي خلکو ستونزې هم هوارې شوې دي.

باید وویل شي، چې د اسلامي امارت په بیا ځلې حاکمیت سره ټول هېواد کې د رغونې او پراختیایي پروژو پلي کولو ته ځانګړې پاملرنه شوې او اسلامي امارت د دې پروژو پلي کول خپل مسؤلیت بولي.