مسکو ته د واشنګټن ګواښ؛ که د سولې مخنیوی وکړي له سختو پایلو سره به مخ شي
د امریکا ولسمشر ډونالډ ټرمپ ګواښ کړی، که روسی سیال یې د سولې مخه ونیسي له سختو پایلو سره به مخ شي.
ټرمپ دا هم ویلي، چې د روسیې ولسمشر ولادیمیر پوتین سره تر لیدنې وروسته دویمه غونډه هم جوړ وي او ټاکل شوې د اوکرایین ولسمشر هم پکې ګډون ولري.
رویټرز خبري اژانس ویلي، ټرمپ د سختو پایلو په اړه وضاحت نه دی ورکړی خو تر دې وړاندې یې مسکو ته د اقتصادي بندیزونو خبرداری ورکړی دی.
ټاکل شوې سبا جمعه ټرمپ او پوتین الاسکا کې د اوکرایین سولې په اړه خبرې اترې وکړي خو د ټرمپ هغو څرګندونو چې وايي، د سولې تړون کې ممکن ځینې سیمې تبادله شي اوکراییني او اورپايي مشران اندېښمن کړي.
د اوکرایین ولسمشر ولادیمیر زیلینسکي وايي، خپلې ځمکې چاته په ډالۍ نه شي ورکولای او ټینګار یې کړی، چې له اوکراییني چارواکو پرته د سولې تړون بې مانا دی.
د ټرمپ دا څرګندونې داسې مهال کیږي، چې روسیې یو ځل بیا ټینګار کړی، چې د جګړې په اړه یې اهداف نه دي بدل شوي.
د اوکرایین او روسیې ترمنځ د جګړې ۱۲۶۷ ورځې ووتې دا جګړه وروسته له هغې پیل شوه، چې اوکرایین د ناټو غړیتوب هڅه پیل کړه.
