اسرائیلي پوځ ویلي ایران تر ۲۰۰ زیات توغندي پر اسرائیلو توغولي او لسګونه بې پیلوټه الوتکې یې د اسرائیلو په لور ور خوشې کړې.

دا برید بېګا ناوخته پیل شو چې څو ساعتونه یې دوام وکړ.

اسرائیل ادعا کوي چې د ایراني برید په لړ کې یې د زیاتره توغندیو مخه نیولې؛ خو د ایران تسنیم خبري اژانس له لوري خپرو شویو ویډیوګانو کې لیدل کېږي، چې ګڼ توغندي د اسرائیلو پر خاوره ( اشغال شوي فلسطین) لګېدلي دي او ویجاړی یې رامنځته کړی.

د ایران رسمي خبري اژانس ویلي، چې د اسرائیلو النقب هوايي هډه یې په خیبر توغندیو ویشتلې، ایران ادعا کړې چې یاده هډه په سوریې کې د ایران کونسلګرۍ برید پرمهال کارېدلې وه.
فلایټ رادار ویب سایټ خبر ورکړی، چې د برید سره هممهاله د اسرائیلو، سوریې، عراق او اردن هوايي حریمونه د هر ډول الوتنو پر وړاندې تړل شوي.

د يادونې وړ ده چې د ایران دا برید د اسرائیلو د هغه برید په غبرګون کې ترسره شوی چې د سوریې دمشق کې یې د ایران کونسلګري په نښه او پکې لوړ پوړي ایراني پوځي چارواکي ووژل شول.

د ایران د بېګاني برید تلفات تر هغې ډېر کم دي چې ګواښ یې کېدلو او تر اوسه د یوازې څو تنو اسرائیلي وګړو د ټپي کېدلو خبر ورکړل شوی.