څلورو میاشتو کې دسپین بولدک له لارې تر ۲۴زرو زیاتې کډوالې کورنۍ هېواد ته راستنې شوې
د هېواد جنوب کندهار کې د کډوالو ثبت کمېټې مسؤلین خبر ورکوي، چې د اکټوبر له لومړۍ د جنورۍ تر ۱۹ مې نېټې پورې د بولدک له لارې څه باندې ۲۴ زره کورنۍ کډوال بېرته هېواد ته راستانه شوي.
د یاد ولایت د تخته پل ولسوالۍ اړوند انځرګي کمپ کې د کډوالو د ثبت کمېټې مسئولینو ویلي، چې یاده موده کې د سپین بولدک له لارې هېواد ته ۲۴ زره او ۴۹۸کډوالې کورنۍ چې ټولیز شمېر یې ۱ لک، ۴۵ زره او ۶۶۰تنه کېږي له پاکستانه په جبري ډول هېواد ته راستنې شوې دي.
د دوی په خبره، چې یاده موده کې د پاکستان له بندخونو ۱۰۶۹ تنه بندیان هم راخلاص شوي او هېواد ته رانتقال شوي دي.
دا په داسې حال کې ده، چې اسلامي امارت د هېواد ټولو لارو څخه راستنېدونکو کډوالو ته د کډوالو ثبت کمېټې ټاکلې، چې تازه راستانه شوي کډوال تر ثبت او ورته بېړنیو مرستو رسولو وروسته یو شمېر مؤسسو ته د لا ډېرو مرستو په موخه ور پېژندل کېږي.
