۳۶۴ تنه روږدي تر درملنې وروسته خپلو کورنیو ته سپارل شوي
د کندهار امنیه قومنداني وایي، ۳۶۴تنه په نشو روږدې یې تر درملنې وروسته خپلو کورنیو ته سپارلې دي.
د یادې قومندانۍ ویاند ملا اسدالله جمشېد حریت نيوز ته په را استول شوې خبرپاڼه کې ويلي، چې د روږدو له ډلې یې ۳۰۰ تنه هرات او ۶۴ نور یې په کندهار کې تداوي شوي دي.
خبرپاڼې زیاته کړې، ياد شمېر روږدي چې د کندهار او هلمند اوسېدونکي پکې شامل دي د کندهار او هرات امنیه قومندانیو د نشه یي توکو پر وړاندې د مبارزې مدیریتونو پر هڅو او همغږۍ تر ۴ او ۶ میاشتنۍ تداوي او روغتیا ترلاسه کېدو وروسته بېرته خپلو کورنیو ته سپارل شوي دي.
د یادونې وړ ده، چې د اسلامي امارت په بیا ځلې حاکمیت سره په ټول هېواد کې د نشه یي توکو د کر، پیراو پلور ترڅنګ د یادو توکو پراستعمال هم کلک بندیز لګېدلی او د هېواد له ګوټ ګوټ په نشو روږدي راټول او تر درملنې وروسته بېرته خپلو کورنیو ته سپارل شوي دي.
