د ملی دفاع وزارت وایي، د ۲۱۵ عزم قول اردو د شوراب له ښوونیز مرکز څخه ۶۵۲تنه ځوان منسوبین له درېیو میاشتو مسلکي، عقیدتي او نظامي زده کړو وروسته فارغ شول.

یاد وزارت زیاته کړې، دغه هڅې یې د ملي اسلامي اردو د مسلکي کولو په موخه پیل کړې دي چې په هره دوره کې په سلګونو منسوبین له مسلکي، نظامی او عقیدتي زده کړو وروسته د هېواد او هېوادوالو د خدمت لپاره ټولنې ته وړاندې کېږي.

په دې اړه جوړ شویو مراسمو کې د دې قول اردو استادانو او مسئولینو د فارغینو د مسئولیتونو او د هغوی زړورتیا ته په اشارې سره ویلي، دا ستاسو د قربانیو ثمره ده چې نن په هېواد کې شریعت تطبیق، د ملي اسلامي اردو تشکیل د مسلمانانو ځوانانو څخه جوړ ده او په ټول هېواد کې اسلامي نظام حاکم دی.

په دغو مراسمو کې فارغینو له هېواد څخه د دفاع لپاره خپله ژمنه تازه کړه او نظامي نمایشات او مانورونه یې ترسره کړل.