د تخنیکي او مسلکي زده کړو ادارې په یوه خبرپاڼه کې ویلي، چې په کابل، بامیان، دایکندي او بغلان ولایتونو کې د ۸۱ میلیونه افغانیو په ارزښت د حرفوي زده کړو بیلابیل ټولګي پیل شوي دي. 

د یادې ادارې د خبرپاڼې له مخې په دې حرفوي زده کړو کې به ۱۳۹۳ کسانو ته په بیلابیلو برخو کې حرفوي زده کړې ورکړل شي، چې په ترڅ کې به یې یاد کسان د یو کسب خاوندان شي. 

د تخنیکي او مسلکي زده کړو ادارې د معلوماتو په اساس دې څه کم یو زر ۴ سوه کسانو ته به د چرګانو د ساتنې، بریښنایی وسایلو جوړونې، موټرجوړونې، موټرسایکل جوړونې، خیاطۍ، لاسي صنایعو ګنډل، د مېوو او سبزیجاتو پروسس، غالۍ اوبدل، د مچیو پالنې، ترکاڼي او کمپیوټر په برخو کې حرفوي زده کړې ورکول کیږي.