ملي دفاع وزارت په یوه خبرپاڼه کې ویلي، چې د ۲۰۳ منصوري قول اردو د لومړۍ پلې لوا څخه ۶۰۰ تنه مجاهد سرتېري له درې میاشتو مسلکي، نظامي او عقیدوي زده کړو بشپړولو وروسته فارغ شوي.

د یاد وزارت د خبرپاڼې له مخې مسؤلینو په دې تړاو په جوړو شویو مراسمو کې ویلي، چې ځوانو منسوبینو روزنه د اسلامي نظام د ساتنې او پایښت لپاره کېږي، چې باید د هېواد له سرحداتو څخه په کلکه دفاع وکړي او د خلکو خدمت په اخلاص او صداقت سره تر سره کړي. 

دغه راز فارغ شویو سرتېرو د نظامي مانورونو په ترسره کولو سره ژمنې کړې، چې په هر ډول سختو شرایطو کې به د ولس خدمت او د هېواد ساتنه کوي.