څلور ولایتونو کې د بېلابېلو جرمونو په تړاو ۱۸ تنه نیول شوي
کورنیو چارو وزارت په یوه خبرپاڼه کې ویلي، چې امنیتي ځواکونو په تېرو ۲۴ساعتونو کې په هرات، جوزجان، زابل او لوګر ولایتونو کې د بېلابېلو جرمونو په تړاو ۱۸تنه نیولي دي.
په خبرپاڼه کې ویل شوي، چې په نیول شویو کسانو کې ۱۲ کسه هرات کې د غلا په تور، ۴ کسه جوزجان کې د غلا، یو کس زابل کې د غلا او یو تن په لوګر ولایت کې د قتل په تور نیول شوي دي.
دا په داسې حال کې ده، چې په دې وروستیو کې امنیتي ځواکونو د جنایي مجرمینو پر وړاندې خپلې هڅې ګړندۍ کړې دي او جنايي جرمونه ډېرې ټیټې کچې ته راښکته شوي دي.
