د ارګ په ایکس پاڼه خپاره شوي خبر کې راغلي، چې رئیس الوزرا مولوي محمد حسن آخوند او د کابینې یو شمېر غړو په ارګ کې د پاکستان د جمعیت علماء پاکستان ګوند مشر مولانا فضل الرحمن په مشرۍ له راغلي پلاوي سره کتلي دي. 

د خبرپاڼې له مخې په دې کتنه کې ښاغلي رئیس الوزرا راغلي پلاوي ته د هر کلي تر څنګ هیله کړې، چې دغه سفر به د دواړو هېوادونو د وروڼو ولسونو تر منځ د اخوت او مثبتو اړیکو د تقویې سبب وګرځي.

په ورته مهال مولوي محمد حسن اخوند ویلي ممکنه ده، چې د دواړو حکومتونو تر منځ ځینې وختونه ستونزې پیښې شي، خو دواړه داسې هیوادونه دي، چې د ولسونو تر منځ یې بیلتون امکان نه لري او علما کرام هم د ګډو ارزښتونو له امله له یو بل څخه نشي بېلېدای. 

دغه راز د افغانستان د اسلامي امارت رئیس الوزرا مولوي محمد حسن اخوند زیاته کړې، چې اوس مهال په افغانستان کې اسلامي نظام حاکم دی او اسلام چاته د ضرر رسولو اجازه نه ورکوي، او اسلامي امارت نه پرېږدي، چې د افغانستان خاوره د پاکستان په ګډون د کوم ګاونډي په خلاف وکارول شي. 

په ورته مهال ښاغلي رئیس الوزرا ویلي، چې علما د دواړو هېوادونو تر منځ د ستونزو په له منځه وړلو کې ښه رول لري او یادونه یې کړې، چې پاکستانی لوری دې په دې هېواد کې د افغان کډوالو له ځورولو لاس واخلي، چې دغه ډول چارې نه یوازې ستونزې کمولی نشي، بلکې لا هم بدبیني او مخالفتونه زیاتوي.

د یادونې وړ ده، چې په دې ناسته کې له پاکستان د راغلي پلاوي مشر مولانا فضل د اسلامي امارت بریا لویه فتحه بللې او هیله یې ښودلې، چې په افغانستان کې د اسلامي امارت حکومت په لا استحکام سره ټولې نړۍ ته مثبت اثرات ورسیږي. 

په همدې حال کې ښاغلي مولانا فضل الرحمن ویلي، چې دوی د کډوالو د ایستلو په تړاو د خپل مخالفت غږ پورته کړی او افغانستان ته د سفر موخه یې د دواړو هېوادونو تر منځ د غلط فهمیو له منځه وړل او د دواړو هېوادونو تر منځ  د سیاسي اړیکو، اقتصاد، تجارت او د یو بل د پرمختګ په برخه کې د همکارۍ لارې چارې لټول بللي دي. 

دغه راز په دې لیدنه کې ټینګار شوی، چې دواړه هېوادونه باید د ټولو ستونزو د حل لپاره په ګډه لارې چارې ولټوي او له داسې اقداماتو ډډه وشي چې د ستونزو د ډېرېدو سبب ګرځي.