د پکتیا زرمت ولسوالۍ کې د ۱۶۹ پراختیايي پروژو چارې پیل شوې
د کلیو بیارغونې او پراختیا وزارت له لوري د پکتیا ولایت زرمت ولسوالۍ کې د شاوخوا ۲۳۶میلیونه افغانیو په لګښت د ۱۶۹ پراختیایي پروژو چارې پیل شوې دي.
د کلیو بیارغونې او پراختیا وزیر ملامحمدیونس اخندزاده د دغو پروژو د پرانېستي پرمهال ویلي، د متوازن انکشاف لپاره ژمن دي او د خپلو امکاناتو په پام کې نیول سره یې د پروژو د تطبیق چارې جاري ساتلې دي.
دغو پروژو کې کلیوالي سړکونه، پلونه، پلګوټي، استنادي دېوالونه او د کانالونو جوړول شامل دي.
د یادو پروژو په بشپړېدو سره به د یادې ولسوالۍ د اوسېدونکي ستونزې هم تر ډېره هوارې شي.
د یادونې ده، چې اسلامي امارت د پروژو په تطبیق کې هغو سیمو ته لومړیتوب ورکړی، چې په تېرو څو لسیزو کې جګړو ځپلې دي او هیڅ ډول پاملرنه ورته نه ده شوې.
