د افغانستان او تاتارستان ترمنځ د ۱۸۳ میلیون ډالرو هوکړې لاسلیک شوې
د صنعت او سوداګرۍ وزارت خبر ورکړی، چې د افغانستان او تاتارستان خصوصي سکټور ترمنځ د ۱۸۳ میلیونه ډالرو په ارزښت د نفتو او ساختماني توکو برخو کې سوداګریزې هوکړې لاسلیک شوې دي.
د دغو هوکړو د لاسلیک پر مهال د صنعت او سوداګرۍ وزیر نورالدین عزیزي له تاتارستاني پانګوالو غوښتي، چې د افغانستان کانونو، کرنې او طبي بوټو برخو کې پانګونه وکړي.
د افغانستان او تاتارستان پلاوو د خوراکي توکو، هلیکوپټرو تولید، اوبو مدیریت، نفت او ګازو، برېښنایي وسایلو تولید، مینځونکو توکو، ودانیزو توکو او اوسپنې ویلي کولو برخو باندې هم خبرې اترې کړې دي.
د تاتارستان لومړي وزیر مرستیال کابل ته راغلي او د اسلامي امارت چارواکو سره یې په بېلابېلو برخو کې خبرې اترې کړې دي.
