فارس خبري آژانس خبر ورکړی، چې اسرائيلي اشغالګرو نن سهار وختي پر ایران هوايي بریدونه ترسره کړي، چې د ایران څو پوځي اهداف یې په نښه کړي.

سرچينه ویلي، چې د دوی د خبریالانو لومړنۍ پلټنې ښیي، دغه بريدونه، د تهران په لویدیځ او جنوب لویدیځ کې شوي چې پکې ځینې نظامي اډې هدف ګرځول شوې دي. 

فارس اژانس زیاتوي، چې د صهیونیستي رژیم پوځ نن سهار اعلان کړی، چې په ایران کې یې پر هستوي تاسيساتو بريد نه دی کړی بلکې يو شمېر نظامي هدفونه یې بمبارد کړي دي.

د امریکا د ملي امنیت شورا ویاند، سین ساوت، د صهیونیستي رژیم  تازه بریدونه د "ځان دفاع" په توګه یاد کړي او زياته کړې یې ده، چې دا د اکتوبر په اوله نېټه د ایران د توغندیز برید په ځواب کې ترسره شوي دي.

 سپینې ماڼۍ اعلان کړی، چې واشنګټن ایران کې پر نظامي هدفونو د اسرائیلو په برید کې ګډون نه درلود.

که څه هم د دې بريد په اړه نور جزيات نه دي ورکړل شوي، خو وړاندې صهيونيستي رژيم په بار بار د غچ اخيستنې او پر ايران د ځوابي بريدونو خبرداری ورکړی وو.