د ټرانسپورټ او هوايي چلند وزارت وايي، چې تېره ورځ د کابل نړېوال هوايي ډګر کې لس پروژې د ریاست الوزراء اقتصادي مرستیال ملا عبدالغني برادر اخوند او د ټرانسپورټ او هوايي چلند وزیر ملا حمیدالله آخندزاده په شتون کې ګټې اخیستنې ته سپارل شوې دي.

په دې اړه مراسمو کې ملا برادر اخوند ویلي، چې دا د ټولو افغانانو او په ځانګړي ډول د ملي سوداګرو او پانګوالو مسؤلیت دی، چې د خپل توان مطابق د هېواد په بیارغونه کې برخه واخلي او په هغو برخو کې د پانګونې له فرصتونو استفاده وکړي، چې هغه د افغانانو لومړیتوب دي.

اقتصادي مرستیال زیاته کړې، چې امنیت تر ټولو مهم شرط دی، چې اوسمهال په افغانستان کې سرتاسري امنیت ټینګ شوی او په مختلفو برخو کې د پانګونې لپاره ښه فرصتونه برابر شوي دي.

د یادونې وړ ده، چې دا پروژې د لسګونو میلیونو افغانیو په ارزښت د خصوصي سکټور له لوري بشپړې شوې دي.