مصري او اسرائیلي پوځیانو نښته کړې؛ دوه مصري وژل شوي
اسرائيلي رسنۍ خبر ورکړی، چې مصري پوځيانو په رفح سيمه کې په صهيونستي عسکرو ډزې کړې، دوه مصري پوځيان وژل شوي.
اسرائيلي ۱۳ تلويزون ويلي چې د مصر او غزې ترمنځ رفح سرحدي سيمه کې د مصري پوځ او اسرائيلي عسکرو ترمنځ د ډزو تبادله شوې په داسې حال کې چې ۱۴ اسرائيلي چينل کاږلي چې مصري عسکرو په اسرائيلي عسکرو ډزې کړې.
اسرائيلي رسنۍ زياتوي چې مصري پوځيانو د اسرائيلو په يو موټر ډزې کړې چې په نتيجه کې يې نښته رامنځته شوې او مرګ ژوبله هم لري خو کره شمېره يې نه ده څرګنده شوې.
بلخوا د والا په نوم اسرائيلي پوځي پاڼې ويلي، چې په ياده نښته کې دوه تنه مصري پوځيان وژل شوي او څو تنه نور ټپيان دي خو اسرائيلي عسکرو ته مرګ ژوبله نه ده اوښتې.
د دې نښتې په اړه مصري چارواکو تر اوسه څه نه دي ويلي.
د يادونې وړ ده چې دا لومړی ځل دی چې د مصري او صهيونستي رژيم د عسکرو ترمنځ د ډزو تبادلې پېښه رامنځته کېږي او په داسې حال کې رامنځته کېږي چې په رفح سيمه کې د اسرائيلي عملياتو په سر د دواړو هېوادونو ترمنځ اړيکې ترينګلې دي او ښايي ياد بريد يې لا ترينګلي کړي.
