له زلزله وهلي دېوال لاندې؛ میانمار کې یوه ښځه له ۶۰ ساعتونو وروسته وژغورل شوه
میانمار کې ژغورونکي ټیمونه تازه وايي، د زلزلې له امله د مړو شمېر نږدې ۲ زره کسانو ته لوړ شوی او زرګونه نور ورک او ټپیان دي.
وروسته له هغه چې میانمار کې او ټایلنډ کې د ۷ اعشاریه ۷ رېښتر په کچه زوروره زلزله وشوه د مړو ګراف ته ځایي چارواکي لاس په خوله شول.
دغه ټیمونه په تازه څرګندونو کې رویټرز خبري اژانس ته ویلي، یوازې په میانمار کې وروستۍ زلزلې له ۱۷۰۰ تنو زیات وژلي دي.
دوی وايي، په ټایلنډ کې بیا ۱۸ کسان مړه شوي او تر دېوالو لاندې د پاتې ۷۶ کسانو د ژغورنې هڅې روانې دي.
اژانس ته د ژغورونکو ټیمونو له ډلې یوه چینايي نن دوشنبه ویلي، چې تر زلزلې وروسته په درېیمه ورځ یې د میانمار په منډلای ښار «ګریټ وال» هوټل کې تر ړنګ دېوال لاندې هغه مېرمن ژغورلې، چې له ۶۰ ساعتونو راپدېخوا بنده پاتې وه.
ریپوټونه وايي، میانمار کې د زلزلې له امله ۳۴۰۰ نور کسان ټپیان شوي او څه باندې ۳۰۰ نور ورک دي.
