د کار او ټولنیزو چارو وزارت د خبر له مخې، د کابل پلچرخي فني او حرفوي زده کړو مرکز څخه  ۵۱۴ تنه له اعتیاد رغېدلي کسان له فني او حرفوي زده کړو فارغ شول.

یاد وزارت وايي، د مسلکي استادانو له لوري دغو کسانو د خیاطۍ، بوټ او بیک ګنډلو او همدارنګه کورنیو برقي وسایلو برخه کې ۶ میاشتنۍ عملي او نظري زده کړې ورکړل شوې دي.

په همدې تړاو جوړو شویو مراسمو کې د کار او ټولنیزو چارو وزارت د کار چارو معین مولوي محمدزاهد احمدزي ویلي، تر ټولو محروم قشر ته د زده کړو زمینه برابرول یو ویاړ دی او زیاته کړې ده، چې له دې وروسته به دغه کسان په کورنیو بوج نه وي او د حلالې نفقې برابرولو مسؤلیت به هم ولري.

هېره دې نه وي، چې د کار او ټولنیزو چارو وزارت په هڅو د هېواد په ګڼو ولایتونو کې له اعتیاد څخه رغېدلو ۵ زره کسان ته فني او حرفوي زده کړې ورکړل شوې، چې له ډلې یې ډېریو کاري وسایل هم ترلاسه کړي دي.