په بهر کې له افغان شخصیتونو سره د اړیکو کمېسیون وایي، د دې کمېسیون له رامنځته کېدو راپدېخوا ۱۰۶۱ تنه پخواني چارواکي، چې له هېواده وتلي وو، بېرته راستانه شوي دي.

 د یاد کمېسیون ویاند احمدالله وثیق رسنیو سره په خبرو کې ویلي، بېرته راستنو شویو کسانو کې په لویه کچه لکه وزیران، معینان، والیان، ولسوالان، د پوځ د لیکو جنرالان او د پارلمان غړي او داسې نور لوړ پوړي چارواکي شامل دي.

 د نوموړي په خبره، ټولو را ستانه شويو ته د خوندیتوب کارتونه ورکړل شوي، څو په هېواد کې ډاډه ژوند وکړي په خبره یې، را ستانه شوي چارواکي دا مهال له خپلو کورنیو سره د خوښۍ ژوند تېروي.

 په ورته مهال د ریاست ‌الوزراء اداري مرستیال مولوي عبدالسلام حنفي د اختر له لمانځه وروسته ویلي، چې له هېواده وتلي کسان کولای شي پرته له کومې اندېښنې هېواد ته را ستانه شي.

 دا په داسې حال کې ده، چې اسلامي امارت له بیا واکمنېدو سره د تېرې ادارې هغه چارواکي چې په تېر کې د اسلامي امارت او ولس پر وړاندې جګړو کې ښکېل وو د اسلامي امارت د مشرتابه له لوري ورته عمومي عفوه هم اعلان شوې ده.