د ایران حکومتي چارو د سلا مشورو ډلې غړي محمد صدر ویلي، روسیې پر اسرائیلو د ایران د دفاعي مرکزونو اطلاعات پلورلي دي.

په دغه ټلوېزیوني مرکه کې د ایران بهرنیو چارو وزیر سلاکار محمد حسین رنجبران هم شتون درلود او دې څرګندونو د دواړو ترمنځ یو پر بل نیوکې راپورته کړې، چې له امله یې رنجبران نن پنجشنبه له دندې استعفا ورکړه.

د ایران حکومت په چارو کې یاد مشورتي غړي ادعا کړې، چې د روسیې دا کار د دې لامل شو، چې اسرائیل په دقیق ډول د ایران مهم نظامي مرکزونه په نښه کړي.

هغه د اسرائیلو تېرې ۱۲ ورځنۍ جګړه کې د اسرائیلو دقیق اهدافو ته په اشارې ویلي، داسې ښکاري چې روسیه نوره له موږ سره نه ده.

هغه همدا راز زیاته کړې، چې اسرائیلو وروستۍ جګړه د دې ښکارندوی ده، چې د ایران او روسیې ستراتژیک تړون نور بې ارزښته دی.

صدر ویلي، روسیه په ترکیې چې د ناټو غړی هم دی اېس ۴۰۰ دفاعي توغندي ورکړي خو تر دې دمه نه ده چمتو شوې، چې ایران ته سوخو ۳۵ ورکړي په خبره یې، نور باید په دې فکر ونه اوسو، چې روسیه دې په سختو ورځو کې د ایران ملاتړ وکړي.

کلونه وړاندې د ایران پخواني ولسمشر محمود احمدي نژاد ویلي و، چې روسیه او امریکا د خپلو موخو لپاره ایران او اوکرایین وېشي او داسې ورځ به حتمي راځي، چې روسیه پر اوکرایین او امریکا پر ایران بمبارۍ پیل کړي.

د احمدي نژاد دا څرګندونې تېره میاشت د اسرائیلو او ایران جګړې په مهال په ټولنیزو رسنیو کې ډېرې لاس په لاس شوې.