له امریکا پرته د ملګرو ملتونو امنیت شورا ټولو غړو په خپره کړې اعلامیه کې له اسرائیلو غوښتي، چې غزه کې د خپلې جګړې د پراخولو پرېکړه سمدستي بېرته واخلي.

د یادې شورا په اعلامیه کې راغلي، غزه کې شاوخوا ۴۱زره ماشومان د خوارځواکۍ له کبله د مرګ له ګواښ سره مخ دي.

اعلامیه کې ویل شوي، د جګړې وسلې په توګه د لوږې کارول د نړېوالو قوانینو له مخې بندي دي او د ملګرو ملتونو له مشور ښکاره سرغړونه ده.

امنیت شورا غزه کې د سمدستي، غیرمشروط او دایمي اوربند د ټینګېدو غوښتنه کړې.

یادې شورا له حماس هم غوښتي، چې سمدستي ټول بندیان خوشي کړي.

ملګرو ملتونو امنیت شورا داسې مهال دغه اعلامیه خپره کړې، چې دا مهال اسرائیلو د غزې بشپړ اشغال په موخه پوځي عملیاتو ته زور ورکړی او هره ورځ په کې سلګونو فلسطینیانو ته مرګ ژوبله اوړي.