د غزې ناورین په ژورېدو دی، لس تنه نور هم له لوږي شهیدان شوي
د غزې روغتیا وزارت تازه ویلي، یاده تړانګه کې نن چهارشنبه د خواځواکۍ او لوږې له کبله ۱۰تنه نور هم شهیدان شوي.
د غزې رسنیو مرکز د یاد وزارت له قوله راپور کې ویلي، دا د اسرئیلو د لوږې پالیسۍ پایله ده.
یاد وزارت په خپل ورځني احصایوي راپور کې ویلي، په ننیو قربانیانو کې دوه ماشومان هم شامل دي.
دې سره غزه کې د لوږې له کبله د ۱۱۹ ماشومانو په کډون د قحطۍ د قربانیانو شمېر ۳۱۳تنو ته ورسېد.
بلخوا تازه له امریکا پرته د ملګرو ملتونو امنیت شورا ټولو غړو په خپره کړې اعلامیه کې غزه کې د عملیاتو درېدو او د سمدستي، غیرمشروط او دایمي اوربند د ټینګښت غوښتنه کړې.
دا په داسې حال کې ده، چې اشغالګر رژیم پر غزې د لوږې حاکمولو پالیسي نوره هم ټینګه کړې.
