غزه کې د حماس جهادي غورځنګ پر یمن د اسرائیلو وروستي بریدونه غندلي او د غزې په ملاتړ یې د حوثي ځواکونو دریځ ستایلی.

اسرائیلو تېره شپه د یمن په پلازمېنه صنعا بریدونه کړي، چې له کبله نږدې ۱۰۰تنو ته مرګ ژوبله اوښتې.

حماس په خپره کړې اعلامیه کې ویلي، د یمني پر وړاندې د صهیونېستانو بمبارۍ، چې ملکي تاسیسات په نښه شوي د عربي هېوادونو په حاکمیت برید او له نړېوالو قوانینو ښکاره سرغړونه ده.

یاد غورځنګ وايي، د صهیونیست رژیم د برید موخه د مظلومو فلسطینیانو د ملاتړ څخه د یمن منع کول دي.

غورځنګ ویلي، زړور او ثابت قدمي حوثي ځواکونه د اسرائیلو په ستوني کې د اغزي په څېر دي او د غزې په ملاتړ د دوی قربانۍ د ستاینې ده.

د اسرائیلو له لوري پر غزې سربېره یمن کې بریدونه وروسته له هغې زیات شوي، چې د صهیونېست رژیم لومړي وزیر بنیامین نتانیاهو څو ورځې وړاندې یوې نقشې ته په کتو وویل، دی له نیل تر فرات د «لوی اسرائیل» جوړولو لوی ارمان لري.