د اسرائیلو ۱۲ چینل د خپلو باخبرو سرچېنو له قوله راپور ورکړی، چې د اسرائیلو پوځ لوی درستیز ایال زامیر ویلي، پوځ دا وړاندوینه نه شي کولی، چې د غزې ښار بشپړ تخلیه به څومره وخت ونیسي.

یاد چینل همداراز ویلي، د صهیونیستي رژیم د مالیې وزیر سموتریچ بیا له لوی درستیز غوښتي، چې پر غزې د کلابندۍ کړۍ نوره هم تنګه او په بشپړ ډول د غزې پر اوسېدونکو برېښنا او اوبه بندې کړي، څو تسلیم او یا له لوږې ومري.

د صهیونیستي رژیم دغو چارواکو داسې مهال دغه څرګندونې کړي، چې د اشغالګر رژیم له لوري د غزې بشپړ نیولو عملیات پيل کړي.

بلخوا د حماس جهادي غورځنګ له ټولو اسلامي هېوادونو غوښتي، چې د خپلې لومړۍ قبلې په اړه خپل مسئولیتونه ترسره کړي.

د یادونې ده، چې د اسرائیلو امنیتي کابینې څو ورځې وړاندې د غزې بشپړ نیولو په اړه د لومړي وزیر نتنیاهو پلان تصویب کړ.