د ترکیې لومړۍ مېرمنې امینې اردوغان د امریکا ولسمشر ډونالډ ټرمپ مېرمنې ملانیا ټرمپ ته لیک لېږلی دی.

رویټرز خبري اژانس وايي، په لیک له هغې غوښتل شوي، چې د اسرائیلو لومړي وزیر سره اړیکه ونیسي او په غزه کې د ماشومانو د وضعیت په اړه خبرې وکړي.

اژانس وايي، د ترکیې لومړۍ مېرمنې له لوري دا لیک وروسته له هغې لېږل شوی، چې د ټرمپ مېرمنې د خپل خاوند په لاس د روسیې ولسمشر ولادیمیر پوتین ته د اوکرایین ماشومانو په اړه لیک ولېږه.

امینې په لیک کې ویلي، «باور لرم چې تاسو به د اوکرایین ماشومانو خواخوږۍ تر څنګ همدا خواخوږي د غزې ماشومانو لپاره هم وښايئ»

اژانس وايي، په لیک کې د ټرمپ له مېرمنې د غزې په اړه ټینګار شوی چې په تړاو یې غږ پورته کړي.

دا په داسې حال کې ده، چې غزه کې د اسرائیلو له لوري د شهیدان شویو ماشومانو شمېر شاوخوا ۱۸ زره تنو ته ورسېد او له هغو ټولو طبیعي حقونو بې برخې شوي، چې یو ماشوم ورته اړتیا لري.