د شمالي کوریا پولې ته نږدې د جنوبي کوریا پوځيانو ډزې کړې دي، همدې ته په غبرګون نن شنبه د شمالي کوریا چارواکو دا کړنه د جګړې پارونه وبلله.

 رویټرز خبري اژانس راپور کې ویلي، له تېر کال راهیسې شمالي کوریا له جنوبي کوریا سره په پوله کلک دېوالونه جوړ وي او د دواړو هېوادونو ترمنځ څلور لارې او رېل پټلۍ په بمونو الوځوي.

 راپور کې د شمالي کوریا د خپرې شوې اعلامیې په اساس لیکل شوي، د جنوبي کوریا سرتېرو د سې شنبې په ورځ له پوځي کرښې د شمالي کوریا لوري ته ورغلي او له هدف نیولو پرته یې ډزې کړې دي.

 همدې کار ته په غبرګون د شمالي کوریا یوه دولتي اژانس د دې هېواد د پوځ مرستیال له قوله لیکلي، که څوک د جوړېدونکو دېوالونو د پروژې د ګډوډۍ هڅه وکړي په وړاندې اقدام کوي او که خبره یې په دې اړه جدي ونه نیول شي پاتې مسؤلیت د هماغه لوري په غاړه دی.

 شمالي کوریا څو ورځې وړاندې د امریکا او جنوبي کوریا په روانو ګډو پوځي تمریناتو نیوکه وکړه او دا کار یې د حقیقي جګړې لپاره تمرین وباله.

 امریکا چې په ښکاره د جنوبي کوریا ملاتړ کوي د چارو کارپوهان وايي، واشنګټن هڅه کوي جنوبي کوریا جګړې ته وهڅوي او هغه متل چې « خړو اوبه کې د ماهیانو نیول اسان دي» له دې تګلارې په استفادې خپل سیالان ځپي.