د افغانستان اسلامي امارت: هېوادونه دې خپلې نیمګړتیاوې او ناکامۍ په افغانستان پورې نه تړي
د اسلامي امارت ویاند مولوي ذبیح الله مجاهد یوځل بیا هغه ادعا رد کړه چې ګنې افغانستان کې ترهګرې ډلې فعالیت کوي.
ښاغلي مجاهد ټینګار کړی، چې افغانستان کې د نورو هېوادونو مخالفې ډلې فعالیت نه لري او هېوادونه باید خپلو نیمګړتیاوو او ناکاميو ته له افغانستان سره تړاو نه ورکوي.
د ملګرو ملتونو سرمنشي مرستیال، پاکستان او چین د امنیت شورا ناسته کې ادعا کړې چې افغانستان کې د داعش خوارجو ډله فعالیت لري او له اسلامي امارت یې دې برخه کې د لازمو اقداماتو غوښتنه کړې.
دغه څرګندونې داسې مهال مطرح کیږي، چې د اسلامي امارت رئیس الوزراء تېره ورځ د چین بهرنیو چارو وزیر سره کتنه کې ډاډ ورکړ، چې اسلامي امارت تېرو څلور کلونو کې ثابته کړه چې هیچاته اجازه نه ورکوي، د افغانستان خاوره د نور پر ضد وکاروي.
