کابل کې د ایران سفیر علي رضا بیګدلي د سرحدونو، قومونو او قبايلو چارو وزیر ملا نورالله نوري سره کتنه کې پر دوه اړخیزو اړیکو غږېدلي.

یاد وزارت حریت راډیو ته ویلي، په دې ناسته کې دواړو لوریو د افغانستان او ایران تر منځ د ښو اړیکو پر بنسټ د اقتصادي پراختیا، متقابل باور، سیمه ییزو مسایلو او د لا ښې همغږۍ د رامنځته کولو په اړه خبرې کړې.

ښاغلي نوري ټینګار کړی، چې په ایران کې له مېشتو افغانانو سره دې د اسلامي او نړیوالو نورمونو په چوکاټ کې چلند وشي.

د ایران سفیر هم ویلي، د ایران حکومت ټولو ګاونډیو هیوادونو ته په ځانګړي ډول افغانستان ته درناوی لري، هڅه کوي چې له افغانستان سره سیاسي، اقتصادي او دوستانه اړیکې نورې هم پراخې کړي.

دغه ناسته داسې مهال شوې، چې دا مهال هره ورځ زرګونه افغانان له ایرانه ایستل کیږي.