د افغانستان بهرنیو چارو وزارت پر ننگرهار او خوست ولايتونو د پاکستاني پوځ د بريدونو په غبرګون، چې په ترڅ کې يې ۳ تنه ملکيان شهيدان او ۷ تنه ټپيان شوي، په کابل کې د پاکستان سفیر احضار کړ او د افغانستان احتجاجلیک يې وروسپاره.

د افغانستان اسلامي امارت د بهرنیو چارو وزارت د پاکستاني پوځ له خوا د افغانستان هوايي حریم نقض او ډیورنډ کرښې ته څېرمه پر ولسي وګړو بمباري په کلکو ټکو غندي او د افغانستان د ځمکنۍ بشپړتيا صريح نقض او پاروونکې عمل یې گڼي.

همداراز پاکستاني لوري ته په ډاگه شوه، چې د افغانستان حریم ساتنه اسلامي امارت لپاره سره کرښه ده او دغه ډول بې‌مسؤولیته کړنې حتما عواقب لري.

په تېر کې هم پاکستاني رژیم پر افغان خاوره بریدونه کړي چې اسلامي امارت یې په غبرګون غاښ ماتوونکی ځواب ورکړی.