خوست او ننګرهار کې ملکي وګړي په نښه شوي
د پاکستان بې پیلوټه او جنګي الوتکو همهاله په خوست او ننګرهار کې ملکیان په نښه کړي.
د خوست والي ویاند مستغفر ګربز وايي، د پاکستان بې پیلوټه الوتکو ډیورنډ فرضي کرښې ته څېرمه سورکاخ سیمه کې ملکي وګړي په نښه کړي، چې له امله یې درې ماشومان شهیدان او پینځه نور ټپيان شوي دي.
ګربز وايي، دا برید د پنجشنبې په شپه شاوخوا لس نیمې بجې د حاجي نعیم ګل په نوم د یو ځایي کس په کور شوی، چې په هېڅ ډلې پورې تړلی نه دی.
والي ویاند وویل، په ټپیانو کې ښځې او ماشومان هم شامل دي.
دا یواځې خوست نه و، چې پاکستاني الوتکو په نښه کړی، د ننګرهار شینوارو ولسوالۍ اړوند ۲۸ مې ویالې سیمه کې هم د شاه سوار په نوم د یو کس پر کور برید شوی، چې درې ماشومان او یوه ښځه پکې ټپیان شوي دي.
