د کورنیو چارو وزارت خبر ورکړی، چې د کورنیو چارو وزیر خلیفه سراج الدین حقاني د چین بهرنیو چارو وزیر وانګ یي سره کتلي.

ښاغلي حقاني دې کتنه کې د افغانستان او چین اړیکې تاریخي وبللې په خبره یې، د تاریخ په اوږدو کې دواړه هېوادونه ښه ګاونډي پاتې شوي دي.

د چین بهرنیو چارو وزیر د دواړو هېوادونو اړیکو ژورو ريښو ته په اشارې ویلي، چین افغانستان سره بېلابېلو برخو کې د همکاریو د پراختیا غوښتونکی دی.

د کورنیو چارو وزارت په خبره، ناسته کې دواړو لوریو د امنیت ټینګښت، نشه یي توکو سره مبارزې، ګډې پولي ساتنې او د پوله ساتو ځواکونو ترمنځ د همغږۍ په پیاوړتیا خبري کړې دي.

د یادونې ده، چې د چین بهرنیو چارو وزیر د افغانستان، چین او پاکستان درې اړخیزې ناستې کې د ګډون په موخه کابل ته راغلی او د اسلامي امارت چارواکو سره لیدنې کتنې کړې دي.