د اسلامي امارت رئیس الوزراء ملا محمد حسن اخوند د چین بهرنیو چارو وزیر وانګ یي سره کتنه کې ویلي، چین دې پر نړیوال سټېج د افغانستان برحقه دریځ ملاتړ په موخه خپلې همکارۍ ته دوام ورکړي.

 رئیس الوزراء ډاډ ورکړی، چې اسلامي امارت هیڅ ډلې او لوري ته د افغانستان له خاورې د نورو په چارو کې د لاسوهنې اجازه نه ورکوي او له نورو هېوادونو هم د دوستۍ، ښو مناسباتو او مثبت تعامل اختیارولو  هیله لري.

 ملا محمدحسن اخوند زیاته کړې، د اسلامي امارت پالیسي له ګاونډیو او نورو هېوادونو سره د ښو اړیکو او همکاریو له لارې مخته تګ دی او هیله یې ښودلې، چې چین په ګډون ټولو هېوادونو سره د دوامداره او مثبتو اړیکو لرلو په پایله کې ښه پرمختګونه ولري.

 بلخوا د چین بهرنیو چارو وزیر ویلي، د افغانستان خپلواکۍ او د افغانانو ټاکنې ته درناوی لري او باوري دي، چې ښه مسیر یې ټاکلی.

 وانګ یي افغانستان سره په اقتصادي او امنیتي برخو کې د همکارۍ چمتووالی ښودلی او له افغان لوري یې د امنیت برخه کې د دوی د اندېښنو د درک غوښتنه کړې.

 نوموړي زیاته کړې، د کابل او بیجینګ ترمنځ امنیتي همکارۍ د افغانستان لپاره د ښه پرمختګ زمینه برابرولی شي.

 خو رئیس الوزراء بیا د چین دغې اندېښنې ته په ځواب کې ډاډ ورکړی، چې اسلامي امارت په عمل کې ثابته کړې، چې څلور کلونو کې د افغانستان له خاورې چاته امنیتي ګواښ نه دی پېښ شوی او اجازه به ورنکړي چې د افغانستان له خاورې نورو ته زیان ورسیږي.