کابل نن د افغانستان، چین او پاکستان درې اړخیزې ناستې کوربه دی
بهرنیو چارو وزارت خبر ورکړی، چې نن چهارشنبه کابل کې د افغانستان، چین او پاکستان استازو ترمنځ درې اړخیزه ناسته ترسره کیږي.
یاد وزارت ویلي، چې دغې ناسته کې به د چین بهرنیو چارو وزیر وانګ یو او د پاکستان لومړي وزیر مرستیال او بهرنیو چارو وزیر اسحاق ډار ګډون وکړي.
د افغانستان، چین او پاکستان چارواکي به یاده ناسته کې د سیاسي، اقتصادي او سیمه ییزو مسایلو په اړه خبر اترې وکړي.
بهرنیو چارو وزارت ویلي، د چین بهرنیو چارو وزیر به د اسلامي امارت لوړپوړ چارواکو سره جلا جلا کتنې هم ولري، چې په دوه اړخیزو اړیکو، اقتصادي همکاریو او متقابل باور لوړونې به په کې خبرې وشي.
