د غزې روغتیا وزارت ویلي، غزې تړانګه کې تازه د خوارځواکۍ او لوږې له کبله ۱۱تنو ژوند له لاسه ورکړی.

دې سره د هغو فلسطینیانو شمېر چې د لوږې او خوارځواکۍ له کبله شهیدان شوي ۲۱۲ تنو ته پورته شو، چې ۹۸ یې ماشومان دي.

د غزې روغتیا وزارت په خپل تازه راپور کې داهم ویلي، چې په تېرو ۲۴ساعتونو کې د اشغالګرو په بریدونو کې ۳۸تنه شهیدان او ۴۹۱ نور ټپیان شوي هم دي.

د خوارځواکۍ او لوږې له کبله د شهیدانو شمېر زیاتوالی داسې مهال اعلانیږي، چې د غزې په ۶۷۴ ورځنۍ جګړه کې ۶۱ زره ۳۹۶ تنه شهیدان، ۱۵۲ زره ۸۵۰ ټپیان او ۱۱ زره نور لادرکه شوي هم دي.

دا په داسې حال کې ده، چې اسرائیلو د غزې بشپړ اشغال پلان تصویب کړی او د غزې ښار اوسېدونکو ته یې روان میلادي کال د اکتوبر تر اوومې وخت ورکړی څو له ښاره ووځي.