پوره اتیا کاله وړاندې نړۍ په لومړي ځل یو لوی بشري وحشت ولړزوله، دا د ۱۹۴۵ کال د اګست شپږمه نېټه وه چې امریکا  د جاپان پر هیروشیما ښار اټومي بم وغورځولو.

 ددې لوی بشري جنایت پایلې خورا دردوونکې وې، شاوخوا یو سلو څلویښت زره کسان پکې ووژل شول او په دې ډول امریکا د اټومي وسلو په زور د قتل عام لومړنی ریکاټ په خپل نوم ثبت کړ.

د نړۍوالو چارو کارپوهان وایي، پر ملکیانو اټومي برید غیرانساني کړنه ده، چې تاثیرات یې لسیزي وروسته لا هم له جاپانیانو قرباني اخلي.

نړۍ‌والي شمېرې ښيي چې د بم د چاودنې پر مهال زرګونه انسانانو ژوند له لاسه ورکړ او زرګونه نور بیا د راډیو اکتیف وړانګو د خپرېدو له کبله په بېلابېلو ناروغیو اخته شول.