د اسرائیلو ملي امنیت انسټیټیوټ تازه څېړنه؛ پوځ له بېسارې بحران سره مخ دی
د اسرائیلو ملي امنیت انسټیټیوټ تازه خپره کړې څېړنه کې ویلي، چې د ۲۰۲۳ کال اکتوبر ۷مې طوفان الاقصی عملیاتو را وروسته د اسرائیلو پوځ، اسرائیلي ټولنه او سیاسي مشروعیت یې ژور بحران سره مخ دی.
دې تازه څېړنې د اسرائیلو دا بحران څو اړخیز ستراتیژیک سقوط بللی او ویلي یې دي، چې دې حالت د پوځ په وړتیا، ټولنیز یووالي، سیاسي باور او د پوځ په دفاعي ځواک مستقیم تاثیر کړی.
د اسرائیلو دې انسټیټیوټ څېړنه کې د پوځ کمزوري، ټولنیزه بېباوري، پوځ کې د انساني ځواک بحران، یهودي مذهبي ډله له پوځي خدمت معاف کول، د بندیانو مسله، پوځ کې د ښځو ګډون مخنیوی، د پوځي کدرونو تېښته، داخلي بېځایه شوي، د رسنیو باور لهمنځه تلل او د دفاعي وړتیاوو بې ساري کمزوري هغه لویې ستونزې یادې شوې، چې اسرائیلي ټولنه، اشغالګر پوځ او د دوی رژیم ورسره لاس او ګرېوان دي.
بلخوا د حماس جهادي غورځنګ د پوځي څانګې القسام ویاند ابوعبیده تېره ورځ تازه وینا کې اسرائیلی پوځ ډارن او ناولی یاد کړ او ویې ویل، چې د فلسطین مجاهد ځواکونه په ګډه د اسرائيلي دښمن پر ضد جګړه کوي او په وروستيو کې يې سلګونه اسرائيلي سرتېري وژلي او ټپيان کړي دي، زرګونه نور يې له سختو صدمو او رواني ناروغيو سره مخ کړي.
د یادونې وړ ده، چې اسرائیلي چارواکو او څېړنیزو ادارو په وار وار پر خپله ماته او بد حالت اقرار کړی او خپل پوځ یې په دې روانه جګړه کې بې ساری ناکام بللی.
