د حماس جهادي غورځنګ د پوځي څانګې القسام وياند ابوعبيده تازه خبرې د قرآن کريم په مبارکو ايتونو پيل شوې، ورپسې يې د الله جل جلاله حمد او په محبوب پېغمبر صلی الله عليه وسلم درود ووايه.
ورپسې يې غزه کې خپل خلک، د اسلامي او عربي نړۍ وګړي او د ټولې نړۍ ازادي غوښتونکي مخاطب کړل او له سلام وروسته په بېلابېلو موضوعاتو وغږېد چې په لاندې ډول دي:

۱- د اسرائيلي دښمن سخته غندنه يې وکړه او اسلامي نړۍ او مسلمانان يې ګرم وبلل چې سره له دې چې په وينه، عربيت او اسلام کې يې ورونه دي، خو د فلسطينيانو هيڅ مرسته يې و نه کړه، غير له هغو خلکو چې په وينا يې «الله پرې رحمېدلی دی».

۲- اسرائيلي پوځ يې «ډارن او ناولی» وباله او زياته يې کړه چې دغه پوځ په وروستيو کې د «جدعون» نوم عملیات پيل کړي وو او د تورات خرافات يې د دې لپاره کارول چې دې جګړې ته جعلي قداست وبښي، «خو دغه عمليات موږ د الله په مرسته د «حجارة داود» عملياتو په لړۍ وځپل، چې الله مو په دې عملياتو کې ستره مرسته وکړه».

۳- ابوعبيده په خپلو خبرو کې وويل چې د فلسطين له نورو مجاهدو ډلو او په ځانګړي ډول له سرايا القدس سره په ګډه د اسرائيلي دښمن په ضد جګړه کوي او په وروستيو کې يې سلګونه اسرائيلي سرتېري وژلي او ټپيان کړي دي، زرګونه نور يې له سختو صدمو او رواني ناروغيو سره مخ کړي او خبره يې تر دې رارسېدلې ده چې د ځانوژنې کچه په کې ورځ له بلې په ډېرېدو ده.

۴- د حماس وياند زياته کړې چې مجاهدين يې له جګړې په پند اخيستو نوي تکتيکونه کاروي او په راکټونو، بمونو، مخامخ جګړې، په سنېپرو د اسرائيلي سرتېرو او پوځي افسرانو په وژلو، د ودانيو او د تونلونو د خولو په الوزولو او نور تکيتکونو بې ساري اتلولۍ ښيي او نړۍ دا هر څه په خپلو سترګو ويني.

۵- نوموړي د غزې د بېلا بېلو هغو ځايونو د نومونو په اخيستو چې د اسرائيلو په ضد سخته جګړه په کې کېږي؛ د غزې مقاومت په معاصر تاريخ کې د نيواکګرو په ضد د جګړې تر ټولو ستره ښوونځی بللی او دې ته يې اشاره کړې چې مجاهدينو يې په وروستيو کې د اسرائيلي پوځيانو د ژوندي نيولو ګڼې هڅې وکړې، خو دا چې د الله اراده بل ډول وه، دغه اسرائيلي پوځيان ووژل شول. د غزې په بېلا بېلو سيمو کې جګړه او د جګړې په ډګر کې د اسرائيلي پوځيانو د ژوندي نيولو هڅې هغه څه دي چې د شنونکو په وینا ښيي چې د جګړې کنټرول د حماس په لاس کې دی او اسرائيلي پوځيان يوازې خپله دفاع کوي.

۶- ابوعبيده د خپلو خبرو په بله برخه کې وويل، چې په جګړه د يوويشتو مياشتو په تېرېدو کتائب القسام په لاندې ټکو ټينګار کوي:
- لومړی دا چې زموږ مجاهدين د اشغالګرو ځواکونو په ضد د پرله‌پسې او ستړې کوونکې جګړې د پر مخ وړلو لپاره په بشپړ ډول چمتو دي، «زموږ مجاهدينو د دښمن تر ځپلو يا شهادته په ثبات او دښمن وژلو بيعت کړی دی، زموږ جګړه په حقه ده او په دې کې هيڅ شک نه شته، د دين او وطن د دفاع جګړه، موږ به په خپل همت او ژمنتوب د ځمکې په ډبرو هم وجنګېږو.

اسرائيلي اشغالګر که د فلسطينيانو د نسل وژنې ته د دوام پرېکړه کوي، نو دا په ورته وخت کې د خپلو پوځيانو لا ډېرو جنازو ته د هرکلي پرېکړه هم ده. د دوی ټانکونه به دوی په مسلمانو لاسونو له چمتو شوي او د الله په لاس د ويشتل شوي اور غورځوونکي مرګ له خولې و نه ساتي.

- په داسې حال کې چې موږ د خپلو مجاهدينو په اتلوليو وياړ کوو، خپل صبرناک او کړېدلی ملت نه شو هېرولی او دا چې موږ د دې ظالم دښمن په ضد ولاړ يو او د الله له لوري راسپارل شوی فرض ترسره کوو، د دوه ملياردي امت هغه فرض نه شي بښلی، چې بدبختانه ضايع کړی يې دی.
په داسې حال کې چې د نړۍ تر ټولو پياوړی ظالم ځواک د وسلې او تجهيزاتو په نه درېدونکو کاروانونو د اشغالګرو مرسته کوي، زموږ د امت حکومتونه او ځواکونه د خپلو ورونو د وژل کېدو، لوږې او تندې او نورو کړاوونو ننداره کوي.

موږ د خپل امت د ټولو بچيانو په وړاندې په ډېر درد او ترخه ژبه تاريخ ته وايو چې:
ای د اسلامي او عربي نړۍ مشرانو، او ای مخورو او لويو ګوندونو او ای د امت عالمانو، د الله په وړاندې به موږ تاسو سره په لانجه يوو، هر يتيم کوچنی او کونډه، ټول ټپيان او کړېدلي او وږي به تاسو سره په لانجه وي، د لسګونو زرو شهيدانو وينې ستاسو په غاړو کې پرتې دي، دا وحشي دښمن له دې امله ستاسو د سترګو په وړاندې دا نسل وژنې کوي، چې له سزا بې غمه دی، ستاسو د چوپتيا تضمين ورسره دی او ستاسو بې ننګي يې په پيسو اخيستې ده، موږ د دې تويېدونکې وينې له مسؤليته هيڅوک هم نه معاف کوو او هر څوک چې څومره خوځښت کولی شي، هغومره يې پړ بولو.

ابو عبيده وړاندې وايي چې موږ چې دا دښمن پېژنو چې څومره کمزوری دی او له دې هم وړاندې د دوی په اړه د الله له دې وينا خبر يو چې «خامخا تاسو د دوی په زړونو کې له الله نه هم ډېر ډار اچوونکي ياست» نو موږ وينو چې زموږ امت په دې اړه څومره کمزوري کوي. ايا دوه مليارده امت نه شي کولی چې د غزې وږو او ناروغو ته يوازې خواړه او درمل ولېږدوي او د هغوی د وينو تويېدل بند کړي.

- د حماس وياند يمن کې د انصار الله (حوثیانو) غورځنګ سخته ستاينه او مننه هم کړې او هغه يې خپل خلک بللي دي، چې له فلسطين او غزې او خلکو او مجاهدينو سره يې په ډېره مېړانه ولاړ دي او په دې لار کې ډول ډول کړاوونه ګالي او داسې فعاله جبهه يې پرانېستې ده چې له جهاده په ټولو ناستو حکومتونو او وګړو يې دليل قايم کړی، هغه حکومتونه چې مسلمانو ملتونو ته د نشې د درملو په توګه کار ورکوي.

هغه د نړۍ له ټولو ازادي غوښتونکو هم مننه کړې چې هر ډول ګواښونه زغمي خو په بېلا بېلو طريقو د فلسطين د مظلومانو ملاتړ کوي او ويلي يې دي که دا هڅې بريالۍ شي او که د اشغالګرو په امر وځپل شي؛ زموږ د ملت لپاره د وياړ ځای دی.

- ابوعبيده ګواښ کړی که دا ځل نتنياهو د بل هر ځل غوندې د خبرو اترو بهير ناکام کړ، موږ د دې ضمانت نه کوو چې بيا خبرو ته راوګرځو او د راسره بنديانو د برخليک پړه به بيا د دښمن په غاړه وي.

- د اسرائيلي اشغالګرو له لوري په عربي نومونو د لاسپوڅو او مزدورو ځواکونو ګومارل ابوعبيده د صهيونستانو د ماتې نښه وبلله او دغه لاسپوڅي يې هغه سوځېدلې پاڼه وبلله چې د ملت د هوښيارۍ، کرامت او د خيانت ردولو د باد په وړاندې به ټينګه نه شي، هغه د غزې اربکيانو توبې ته وربللي که نه په وينا له داسې برخليک سره به مخ شي، چې د هر غدار او بزدل لپاره به ترې پند جوړ شي.

د حماس خوله‌ور وياند د خپلو خبرو په پای کې په خورا ژورو او اغېزمنو الفاظو د خپل کړېدلي ولس ډاډينه کړې ده او هغوی يې د الهي پيغمبرانو لارويان بللي دي چې په وينا يې په غېږو کې يې سړي روزلي دي. ابوعبيده له سختو کړاوونو سره سره د ولس صبر او همت داسې څه بللی چې دښمن له بل هر شي همدې ته ډېر اندېښمن دی.

هغه خپلې خبرې په مشهور شعار «وإنه لجهاد، نصرٌ أو استشهاد» پای ته رسولې دي، په دې معنا چې دا خو جهاد دی، يا به سوبه وي او يا شهادت.