حوثي سمندري ځواکونو تازه یوه بله بېړۍ په نښه او له منځه یوړه
د یمن حوثي ځواکونو ویاند تازه خبر ورکړی، چې د یمن بحري ځواکونو د توغندیو او بې کپټانه کښتیو په وسیله سور سمندرګي کې اسرائیلو سره تړاو لرونکې بېړۍ په نښه او ډوبه کړې ده.
د یمن د وسلهوالو ځواکونو ویاند یحیی سریع د دې بېړۍ نوم «ETERNITY C» ښودلی او ویلي یې دي، چې اشغالي فلسطین کې د اسرائیلو ام الرشراش بندر ته روانه وه.
یحیی سریع ویلي، چې دا بېړۍ یې په بشپړ ډول ډوبه کړې او د دې عملیاتو انځورونه او ویډيو ثبت شوي دي.
نوموړي په تازه خپور کړي پیغام کې ویلي، چې له برید وروسته د یمن ځانګړو سمندري ځواکونو د بېړۍ د عملې ځینې غړي وژغورل، هغوی ته طبي پاملرنه وشوه او یوې خوندي سیمې ته انتقال شول.
حوثیانو ویلي، چې دې بېړۍ د یمن له هغو اعلان شویو قوانینو سرغړونه کړې، چې نه شي کولی اشغالي فلسطین سیمو کې اسرائیلي بندرونو ته تګ راتګ وکړي.
د یادونې وړ ده، چې دا له تېرو درېیو ورځو راهیسې دویمه بېړۍ ده، چې حوثي بحري ځواکونو لخوا د غزې پر ننګه په نښه کیږي، دوی تېره ورځ ګواښ کړی، که حالات بدل شي، چمتو دي هر ډول اقدام وکړي.
