د افغانستان اسلامي امارت د عامې روغتیا وزارت خبر ورکړی، چې وزیر مولوي نورجلال جلالي سویس ته د خپل سفر په ترڅ کې د روغتیا د نړیوال سازمان له مشر ډاکټر تیدروس سره کتنه کې په یو شمېر موضوعاتو خبرې کړې.

یاد وزارت زیاتوي، چې په دغه سفر کې ښاغلي وزیر د روغتیا د نړېوال سازمان پر مشر سربېره له یو شمېر همکارو بنسټونو سره هم د ساري ناروغیو د کنټرول، د پولیو د له منځه وړلو، د روغتیايي خدمتونو د پراختیا او معیاري کېدلو په تړاو خبرې کړې.

په ورته مهال د عامې روغتیا وزارت مسؤلین څرګندوي، چې د نړېوالو بنسټونو چارواکو له افغانستان سره د روغتیا په برخه کې د دوامداره همکاریو ډاډ ورکړی دی.

د یادولو ده، چې په تېرو شلو کلونو کې د هېواد څه باندې پنځوس سلنه خاوره د روغتیايي خدمتونو له وړاندې کولو څخه بې برخې وه، خو اوس اسلامي امارت هڅه کوي چې په ټول افغانستان کې خلکو ته معیاري روغتیايي خدمات چمتو او وړاندې کړي.