له نن پوره ۱۰۶ کاله وړاندې افغان مجاهد ولس په خپلو نه ستړي کېدونکو هڅو او مبارزو سره وتوانید چې د نولسمې پیړۍ تر ټولو خونخوار او عالمګیر ښکیلاک ته په ماتې ورکولو د یو خپلواک هېواد په توګه سر راپورته کړي.

د هغه مهال انګریز امپراتورۍ د نړۍ د نورو هېوادنو په ګمان پر افغانستان یرغل راوړ او دغه استعماري هڅې له ۱۸۳۹ نه  راپیل او تر ۸۰ کلونو ۶ میاشتو او ۱۸ ورځو یې دوام وکړ.

انګریزي استعمار په دې څه باندې اتیا کلونو موده کې پرلپسې کوښښونه وکړل چې د زور زیاتي، پیسو او کړاو له لارې افغان مجاهد ملت مات او د افغانستان په نوم جغرافیه د خپلو مستعمراتو په نوملړ کې ور اضافه کړي.

خو افغان مومن ولس او غیورو اسلافو بې ساری ثبات  او استقامت وکړ، اتیا کاله یې د انګریزي استعمار په وړاندې مبارزه وکړه، د هغوی هر ډول دسېسې او توطیې شندې او په ۱۹۱۹ کال یې له دښمن بشپړه خپلواکي تر لاسه کړه.

اسلامي امارت نن د زمري یا اسد ۲۸ مه په ټول هېواد کې د خپلواکۍ د ملي ورځې په مناسبت عمومي رخصتي اعلان کړې ده.