د افغانستان بهرنیو چارو وزارت خبر ورکړی، چې د بهرنیو چارو وزیر مولوي امیرخان متقي ایراني سیال عباس عراقچي سره ټیلفوني خبرو کې د افغان کډوالو وضعیت، غزه کې انساني ناورین او  پر دوه اړخیزو اړیکو خبرې و کړې.

مولوي امیرخان متقي له ایرانه د کډوالو ایستل د اندېښنې وړ بللي او ټینګار یې کړی، یاده پروسه باید تدریجي او د کډوالو کرامت ته په خوندیتوب تر سره شي.

نوموړي غزه کې انساني وضعیت کړکېچن بللی، د اغیزناکو اسلامي هېوادونو پر رول یې ټینګار کړی او  د روانې نسل وژنې  د پای غوښتنه یې کړې.

بل‌خوا د ایران بهرنیو چارو وزیر هم ژمنه کړې، هڅه به وکړي افغان کډوالو ایستلو پروسه په تدریجي او د هغوی عزت او کرامت ته په درناوي سره ترسره کړي.

عباس عراقچي غزه کې روان وضعیت ته په اشارې ویلي، د اسلامي همکاریو سازمان د بهرنیو چارو وزیرانو ناستې رابلل اړتیا ده، څو د غزې د کړکېچ د حل‌لارو موندلو په اړه خبرې وشي.