د پوهنې وزارت مسؤلین وایي، په افغانستان کې د اسلامي امارت له بیا واکمنېدو را وروسته په ټول هېواد کې ۹۷۲ ښوونځي جوړ شوي دي.

د پوهنې وزارت ویاند منصور احمد حمزه ویلي، له دې ډلې یې یوازې په تېرو شپږو میاشتو کې د هېواد په بېلابېلو ولایتونو کې ۵۵۹ ښوونځیو ته ودانۍ جوړې کړې او د ۶۰ نورو د رغونې چارې دوام لري.

ښاغلي حمزه زیاته کړې، چې کاري ډلو یې د هېواد بېلابېلو ولایتونو ته په سفرونو کې د پوهنې اړوند سروې کړې، چې له ارزونې وروسته به ټولو هغو سیمو ته د پوهنې وزارت خدمات وغځول شي، چې له دې وړاندې په کې د پوهنې په برخه کې کوم څرک نه لیدل کېږي.

نوموړي همداراز ویلي، د ښوونکو د ظرفیت لوړونې ترڅنګ یې د زده کوونکو عملي زده کړو ته هم پاملرنه زیاته کړې ده.