د حج مناسکو اداء کولو لپاره منی شریفې ته د افغان حاجیانو لېږد پیل شو
د حج او اوقافو وزارت وایي، د ایام تشریق د ورځو په رارسېدو سره د حج مناسکو د اداء کولو لپاره د افغان حاجیانو کاروانونه د مکې معظمې له عمارې د منی شریفې په لور روان شول.
مکه مکرمه کې د تسکین او ترحیل کمېټې مسئول مولوي عطاءالله خادم ویلي، د ذوالحجې میاشتې په اتمه له ټولو عمارو څخه د افغان حاجیانو کاروانونه پیل شوي دي.
افغان حاجیانو منی شریفې ته د حج مناسکو د اداء کولو لپاره په خپل وخت د حاجیانو د لېږد پروسه ستایلې ده.
منی د مکې مکرمې ښار په پنځه کیلومټرۍ کې هغه ځای دی، چې د حاجیانو په ورتللو سره پکې د حج اعمال پیلېږي.
