پېښو ته د رسېدو په چارو کې د دولت وزارت وایي، په هېواد کې د بارانونو وروستۍ څپې او په ځینو ولایتونو کې د سېلابونو د راوتلو له کبله ۳۳تنه شهیدان او ۲۷ تنه نور ټپیان شوي دي. 

د دې وزارت ویاند مولوي محمد عبدالله جان سایق ویلي، د سېلابونو له کبله ۶۰۶ کورونه په بشپړ او قسمي ډول ویجاړ او ۱۹۵۰ جریبه کرنیزه ځمکه تخریب شوې ده. 

ښاغلی سایق وایي، د سېلابونو له کبله له زرو زیاتې کورنۍ هم زیانمنې شوې او په ټول هېواد کې د نږدې ۸۵ کیلومټره سړکونه او فرعې لارې د ویجاړېدو ترڅنګ ۲۰۰ څاروې هم تلف شوي دي. 

نوموړي همداراز زیاته کړې، چې د وري میاشتې له پیله تر اوسه یې له ۲۲زره ۸۵۱ څخه زیاتو زیانمنو او بې وزله کورنیو سره د ملي او نړېوالو مؤسسو په همکارۍ بېړنۍ مرستې کړي او دا لړۍ لاهم دوام لري. 

دا په داسې حال کې ده، چې د سېلابونو رامنځته کېدو په لومړنیو ساعتونو کې پېښو ته د رسېدو په چارو کې د دولت وزارت، ملي دفاع، کورنیو چارو، ټولګټو او عامې روغتیا وزارتونو او سیمه ییزو مسئولینو سره په همکارۍ زیانمنو سیمو ته د ژغورنې او مرسته کوونکو ټېمونه رسېدلي او په ښه توګه یې د ژغورنې او مرستې رسونې عملیات تر سره کړي دي.