کندهار کې د ۳ میلیونه افغانیو په ارزښت د يو بند جوړېدو چارې پیل شوې
د کندهار ولایت کرنې ریاست د دغه ولایت ارغنداب ولسوالۍ کې د ۳ میلیون افغانیو په ارزښت د اوبو یو بند جوړېدو خبر ورکوي.
د دغه ریاست ویاند ننګیالي سمون حريت نيوز ته ويلي، چې د تړلې درې په نوم د یاد بند جوړېدو چارې د اسلامي امارت مشرتابه د هدایت پر اساس د یادې ولسوالۍ د محمد یعقوب خان کلا ختیځ لور کې پيل شوې دي.
د ښاغلي سمون په خبره یاد بند چې ۲۵ متره اوږدوالی لري د ۳ میلیونو افغانیو په لګښت سره په اساسي ډول سره جوړېږي، چې د ۴زره متر مکعب اوبو ذخیره کولو وړتيا به ولري.
د یادونې وړ ده ، چې د عالیقدر امیرالمؤمنین حفظه الله په ځانګړي حکم سره د هېواد ټولو ولایتونو کې د اوبو ذخیروي بندونه جوړېږي، چې موخې یې تر ډېره د سېلابي اوبو کنټرول، ترځمکې لاندې اوبو پیاوړتیا او د کرنیزو ځمکو اوبو خړول ښودل شوې.
