د اسلامي امارت ویاند مولوي ذبیح الله مجاهد په اېکس پاڼه لیکل شوي، چې د دفاع وزیر مولوي محمد یعقوب مجاهد، د کورنیو چارو وزیر خلیفه سراج الدین حقاني او د استخباراتو لوی رئیس ملا عبدالحق وثیق کندهار ته سفر کړی دی.

ښاغلي مجاهد ویلي، په دې سفر کې چې، د دفاع او د کورنیو چارو وزارتونو مرستیالانو ملا عبدالقیوم ذاکر او مولوي محمد نبي عمري هم ګډون درلوده د اسلامي امارت مشرتابه ته د هېواد د امنیت په اړه راپور وړاندې شوی.

خبرپاڼه کې راغلي، چې په دې کتنه کې د یادو امنیتي ارګانونو د وړاندیزونو په اوریدلو سربیره مسؤولینو ته د اجرأتو په اړه لازم هدایات شوي او د لا ښه نظم، تجهیز او ظرفیت لوړونې په اړه تصمیمونه نیول شوي.