د افغانستان لپاره د پاکستان ځانګړي استازي کابل کې د پاکستان سفارت کې د مارچ ۲۳مې په مناسبت غونډې ته ویلي، د پاکستان او افغانستان اقتصادي ګټې په بنیادي توګه سره تړلې دي او دواړه هېوادونه باید د سیمه ییز اقتصادي پرمختګ لپاره خپلې هڅې سره یوځای کړي.

کابل کې د پاکستان سفارت په خپره کړې خبرپاڼه کې راغلي، دې مراسمو کې صادق خان په افغانستان کې سوله او پرمختګ د سیمه ییز ثبات لپاره اړین او افغانستان یې د پاکستان له مهمو شریکانو بللی دی.

ښاغلي صادق خان د دوه اړخیزې سوداګرۍ د پراختیا او سیمه ییزو اړیکو د پیاوړتیا لپاره د دواړو هېوادونو په ګډ کار ټینګار کړی په خبره یې، اسلام اباد له کابل سره د پیاوړو او متقابلو ګټورو دوه اړخیزو اړیکو ته ژمن دي.

د افغانستان لپاره د پاکستان ځانګړی استازی داسې مهال افغانستان خپل مهم او اقتصادي شریک بولي، چې په تېرو څو لسیزو کې پاکستان د افغانستان په کورنیو چارو کې د لاسوهنې هڅه کړې او د افغانستان اقتصاد او سوداګرۍ ته یې زیان رسولو ترڅنګ د افغانستان په ناامنۍ کې خپلې ګټې لټولې دي، خو اوس چې د جګړې او ناامنۍ اوریې تر لمنې ور رسېدلی او له نړېوالې انزوا سره مخ دی تل له افغانستان سره د ښو اړیکو جوړولو خبره کوي.