د بهرنیو چارو وزیر مولوي امیرخان متقي په افغانستان کې د ملګرو ملتونو سرمنشي ځانګړې استازې او د یوناما مشرې روزا اتونبایوا سره کتلي دي.

بهرنیو چارو وزارت ویلي، دې کتنه کې د بهرنیو چارو وزیر د بېلابېلو موضوعاتو په اړه د اسلامي امارت دریځ روښانه کړی.

مولوي امیرخان متقي د اسلامي امارت د نظر د رعایت په صورت کې ملګرو ملتونو ته په ټولو نوښتونو کې د همکارۍ ډاډ ورکړی.

بلخوا اتونبایوا د ملګرو ملتونو امنیت شورا ته د خپلې وروستۍ وینا او د یومانا ماموریت د تمدید او ویانا کې د خپلو ناستو په اړه معلومات ورکړي.

نوموړې د نشه یي توکو سره د مبارزې، خصوصي سکټور پیاوړتیا او بانکدارۍ ستونزو د حل په اړه  هم د ملګرو ملتونو پر هڅو خبرې کړې دي.

د یادونې ده، چې د ملګرو ملتونو امنیت شورا څه موده وړاندې افغانستان کې د یوناما فعالیت د یو بل کال لپاره تمدید کړ.